Vətən uğrunda canından keçən qəhrəmanların əziz xatirəsinə
27 Sentyabr Azərbaycan xalqının yaddaşına Vətən müharibəsinin başladığı gün kimi daxil olmaqla yanaşı, həm də şəhidlərimizin müqəddəs xatirəsinin dərin ehtiramla yad edildiyi Anım Günüdür. Bu tarix xalqımızın milli iradəsinin, birliyinin, həmrəyliyinin və Vətən sevgisinin təcəssümüdür. 27 Sentyabr hər bir azərbaycanlının qəlbində həm qürur, həm də sonsuz kədər hissi yaradan əlamətdar gündür. Çünki bu tarix bizə Vətən torpağının bütövlüyü uğrunda canından keçən minlərlə qəhrəman oğul və qızımızı xatırladır. Onların hər birinin həyatında Vətənə bağlılıq, torpağa məhəbbət, xalq qarşısında məsuliyyət və fədakarlıq nümunəsi vardır. 2020-ci il sentyabrın 27-də başlayan Vətən müharibəsi Azərbaycan tarixinin ən mühüm və şərəfli səhifələrindən birinə çevrildi. Azərbaycan Ordusunun əsgər və zabitləri böyük qəhrəmanlıq və igidlik göstərərək Vətən qarşısında müqəddəs borclarını yerinə yetirdilər. 44 gün davam edən müharibə xalqımızın yaddaşında qəhrəmanlıq dastanı kimi qaldı. Bu müharibə Azərbaycan xalqının öz doğma torpaqlarına bağlılığını, milli birliyini və Vətən sevgisini bütün dünyaya nümayiş etdirdi. Həmin günlərdə cəmiyyətimizin bütün təbəqələri bir yumruq kimi birləşdi. Əsgər ön cəbhədə döyüşdü, xalq arxa cəbhədə Ordumuza mənəvi və maddi dəstək göstərdi. Valideynlər övladlarını Vətənin müdafiəsinə yola saldılar. Ana ürəyinin ən ağır sınağına dözərək oğlunun arxasınca dua etdi. Atalar övladları ilə qürur duydu. Bacı və qardaşlar şəhid olan doğmalarının xatirəsini əziz tutdular. Hər bir Azərbaycan ailəsi bu böyük mübarizənin bir parçasına çevrildi. Şəhidlərimizin qəhrəmanlığı isə tariximizin ən qiymətli səhifələrindən biri kimi gələcək nəsillərə ötürülməlidir. Onların adı yalnız məzar daşlarında deyil, xalqımızın yaddaşında, məktəblərimizin tarix dərslərində, vətənpərvərlik tədbirlərində, dövlətçilik düşüncəmizdə və gələcək nəsillərin qəlbində yaşamalıdır. Çünki şəhidlik yalnız ölüm deyil, Vətən naminə ən böyük fədakarlıqdır. Şəhidlər öz həyatlarını Azərbaycan torpağının bütövlüyü və xalqımızın gələcəyi naminə fəda etdilər. Onların göstərdiyi qəhrəmanlıq hər birimiz üçün mənəvi örnəkdir. Bu gün Azərbaycan gəncliyinin qarşısında mühüm vəzifələr dayanır. Gənclərimiz öz tarixini, milli dəyərlərini, dövlətçilik ənənələrini və şəhidlərimizin həyat yolunu dərindən öyrənməlidirlər. Vətənpərvərlik yalnız Vətəni sevmək haqqında danışmaq deyil, həm də yaxşı oxumaq, öz peşəsinə məsuliyyətlə yanaşmaq, cəmiyyətə faydalı insan olmaq, dövlətin inkişafına öz töhfəsini verməkdir. Məktəb bu baxımdan xüsusi əhəmiyyət daşıyır. Müəllimlər şagirdlərə yalnız bilik vermir, həm də onların şəxsiyyət kimi formalaşmasına, milli-mənəvi dəyərlərə bağlı böyüməsinə xidmət edirlər. Tarix müəlliminin üzərinə isə xüsusilə böyük məsuliyyət düşür. Çünki tarix keçmişi öyrətməklə yanaşı, gələcəyə yol göstərir. Şagirdlər bilməlidirlər ki, bu gün yaşadığımız müstəqil Azərbaycan böyük mübarizələr, fədakarlıqlar və qəhrəmanlıqlar hesabına formalaşıb. Şəhidlərimizin həyat hekayələri gənclərimiz üçün əsl vətənpərvərlik məktəbidir. Onların ailələrinə göstərilən diqqət və qayğı da xalqımızın şəhidlərə olan ehtiramının ifadəsidir. Şəhid ailələri bizim üçün xüsusi hörmət və ehtirama layiqdir. Çünki onlar Vətən uğrunda ən əzizlərini itiriblər. Bu itkinin ağrısını sözlə ifadə etmək mümkün deyil. Anım Günü həm də şəhidlərimizin ailələrinin yanında olduğumuzu göstərmək, onların qəhrəman övladlarının xatirəsini daim yaşatmaq üçün mühüm gündür. 27 Sentyabr bizə bir daha xatırladır ki, Vətən sevgisi nəsildən-nəslə ötürülən müqəddəs bir dəyərdir. Bu gün məktəblərdə keçirilən tədbirlər, şəhidlərimizin xatirəsinə həsr olunan dərslər, söhbətlər, təqdimatlar və anım mərasimləri gələcək nəsillərin milli yaddaşının formalaşmasında mühüm rol oynayır. Şagirdlərimiz bilməlidirlər ki, Azərbaycanın hər qarış torpağının arxasında böyük bir tarix, böyük bir zəhmət və böyük bir fədakarlıq dayanır. Biz şəhidlərimizin əmanətinə sadiq qalmalı, onların xatirəsini daim uca tutmalıyıq. Onların arzularını yaşatmaq üçün daha güclü, daha savadlı, daha həmrəy və daha məsuliyyətli cəmiyyət qurmağa çalışmalıyıq. Bu müqəddəs gündə Vətən müharibəsində canından keçən bütün şəhidlərimizin ruhu qarşısında baş əyirik. Onların valideynlərinə, övladlarına, həyat yoldaşlarına və yaxınlarına dərin hörmətimizi bildiririk. Şəhidlərimizin qəhrəmanlığı Azərbaycan tarixində əbədi yaşayacaqdır. Onların adı zaman keçdikcə unudulmayacaq, əksinə, gələcək nəsillər üçün daha böyük məna daşıyacaqdır. Çünki xalq öz qəhrəmanlarını yaşatdıqca onun milli yaddaşı və mənəvi gücü də yaşayır. 27 Sentyabr – Anım Günü bizə həm hüznü, həm qüruru, həm də böyük məsuliyyəti xatırladır. Bu gün şəhidlərimizi yad edərkən onların bizə əmanət etdiyi Vətənə daha böyük sevgi və sədaqətlə bağlanmalı, Azərbaycanımızın inkişafı naminə hər birimiz öz üzərimizə düşən vəzifəni layiqincə yerinə yetirməliyik. Şəhidlər ölmürlər. Onlar xalqın yaddaşında, tariximizin şərəfli səhifələrində və gələcək nəsillərin qəlbində əbədi yaşayırlar. Uca Allah bütün şəhidlərimizə rəhmət eləsin, onların müqəddəs ruhları qarşısında baş əyirik. Şəhidlərimizin əziz xatirəsi daim yaşayacaq! Vətən sağ olsun!
Müəllif: Qamət Abbasov — Qamət Abbasov adına 284 nömrəli ümumtəhsil məktəbinin tarix müəllimi